विश्व स्वास्थ्य संगठन (डब्लुएचओ) ले हाइड्रोक्सिक्लोरोक्विनलाई कोरोना भाइरसको औषधिका रुपमा परीक्षण गर्न रोक लगाएको छ ।

कोरोना संक्रमितको उपचारका लागि भन्दै मलेरियाको यो औषधिको पक्षमा अमेरिकी राष्ट्रपति डोनाल्ड ट्रम्प र ब्राजीलका राष्ट्रपति जायर बोल्सोनारोसहितका केही नेताले वकालत गर्दै आएका छन् । 

मलेरियाको औषधि हाइड्रोक्सिक्लोरोक्विनको परीक्षण सुरक्षाका हिसाबले जोखिमपूर्ण रहेको भन्दै त्यसमा रोक लगाइएको डब्लुएचओले जनाएको छ । डब्लुएचओले यो औषधिको परीक्षणमा अस्थायी रुपमा रोक लगाइएको जानकारी दिएको छ । 

प्रतिष्ठित जर्नल द लनसेटमा हालै प्रकाशित अनुसन्धान प्रतिवेदनमा हाइड्रोक्सिक्लोरोक्विन र क्लोरोक्विन औषधि दिइएका कोभिड–१९ का बिरामीको मृत्युको जोखिम बढी रहेको उल्लेख गरिएको थियो । त्यसलगत्तै डब्लुएचओले यो औषधिको परीक्षणमा तत्कालका लागि रोक लगाएको हो । 

अमेरिकी राष्ट्रपति ट्रम्पले लगातार यो औषधिको वकालत गर्दै आफूले कोरोनाबाट जोगिन यो औषधि खान थालेको समेत बताएका थिए ।

कुनै पनि वैज्ञानिक प्रमाण र स्वास्थ्य विज्ञको सिफारिस बिना नै उनले हाइड्रोक्सिक्लोरोक्विनलाई कोरोना भाइरसविरुद्धको औषधिका रुपमा सुझाव दिँदै आएका छन् । 

हालसम्मका कुनै पनि अनुसन्धानले हाइड्रोक्सिक्लोरोक्विन र क्लोरोक्विन कोरोना भाइरसविरुद्ध प्रभावकारी हुने प्रमाण फेला पारेका छैनन् । स्वास्थ्य विज्ञले समेत यसको प्रयोगलाई लिएर चिन्ता प्रकट गर्दै आएका छन् । 

यो औषधिको प्रयोगले मुटुको समस्या उत्पन्न हुने र बिरामीको मृत्युको जोखिम झन बढ्ने पछिल्लो अध्ययनमा पाइएको छ । 

डब्लुएचओले कोरोना भाइरसका सम्भावित खोप तथा औषधिहरुको परीक्षणमा अगुवाई गरिरहेको छ ।