अविरल वर्षाका कारण गएको पहिरोमा परि देशका बिभिन्न ठाउँहरूमा ज्यान गुमाउनेको संख्या बढिरहेको छ । गएराति पोखराका विभिन्न स्थानमा ४ जनाको ज्यान गएको छ, ९ जना घाइते भएका छन् । लमजुङमा पहिलोले घर पुरिंदा एकैघरका ३ जनाको मृत्यु भएको छ भने म्याग्दीमा पहिरोका कारण ७ जना बेपत्ता भएका छन् ।

राति करिब २ः४५ बजेको समयमा पोखरा महानगरपालिका-१८ सराङकोट गोठादीस्थित टङ्कबहादुर थापाको घरमाथिबाट खसेको पहिरोमा पुरिँदा ३ जनाको मृत्यु भएको छ ।त्यसैगरी पोखरा महानगरपालिका-२५ हेमजामा रामचन्द्र अधिकारीको घर पहिरोमा पुरिँदा अधिकारीकी आमा ७० वर्षीया भीमकली अधिकारीको घटनास्थलमै मृत्यु भएको प्रहरीले जनाएको छ । घटनामा अन्य मानवीय क्षति नभए पनि ३ वटा बाख्रा पुरिएका छन् ।

पोखरा-१८ छोरेपाटन सिमलटुँडामा चन्द्रबहादुर मगरको घर माथिबाट खसेको पहिरोमा परी मगरसहित उनका श्रीमति शान्ति र छोरा सुशान मगर सामान्य घाइते भएका छन् । 

लमजुङमा पहिरोले घर पुरिँदा एकै परिवारका ३ जनाको ज्यान गएको छ । ज्यान गुमाउनेमा बेसीसहर नगरपालिका-७ सातबीसका ३२ वर्षीय दीपक तामाङ, उनकी पत्नी २५ वर्षीया बिमायाँ तामाङ र ९ वर्षीय छोरा सेवाङ तामाङ रहेका छन् ।  

गएराति ११ बजे पहिरोले घर पुरिँदा उनीहरूको मृत्यु भएको लमजुङका प्रहरी प्रमुख डिएसपी गंगाबहादुर थापाले जानकारी दिए ।

त्यसैगरी म्याग्दीको धौलागिरी गाउँपालिका-६ मराङको रिखामा पहिरो जाँदा आज बिहान ७ जना बेपत्ता भएका छन् ।

मराङको घण्टीवाङ भन्ने ठाउँबाट खसेको पहिरोले २ परिवारका ७ जना बेपत्ता भएका हुन्  ।

पहिरोले भीमप्रसाद जुग्जाली र धनबहादुर जुग्जालीको घर बगाएको छ । भीमप्रसादको घरमा ४ र धनबहादुरको घरमा ३जना थिए । 

त्यस्तै, मराङकै कल्लेनीको धारखोलामा आएको बाढीले दुई वटा घर बगाएको छ । वीरबहादुर पुन र परदेवी पुनको घर बगाएको स्थानीय भुवानी पौडेलले जानकारी दिए । घरका मानिसले भागेर ज्यान बचाएका छन् ।

भाग्ने क्रममा १ जना घाइते भएका छन् । यसैबीच रघुगङ्गा नदीमा आएको बाढीले म्याग्दीको उत्तरी क्षेत्र हुँदै हिमाली जिल्ला मुस्ताङ जोड्ने बेनी-जोमसोम सडकको राहुघाटस्थित बेलिब्रिजसमेत बगाएको प्रमुख जिल्ला अधिकारी ज्ञाननाथ ढकालले बताए ।