बहिनी नाता पर्ने किशोरीमाथि पटकपटक बलात्कार गरेको अभियोग लागेका वडाध्यक्ष जेल चलान भएका छन् । कालीकोटको खाँडाचक्र नगरपालिका-६ का वडाध्यक्ष जगदिश शाही पूर्पक्षका लागि जेल चलान भएका हुन् । 

बहिनी नाता पर्ने १६ वर्षीया किशोरीलाई बलात्कार गरेको आरोपमा पक्राउ परेका ५१ वर्षीय शाहीलाई जिल्ला अदालत कालीकोटले कारागार चलान गर्ने आदेश दिएको हो ।

जबरजस्ती करणी मुद्दामा प्रमाण बुझ्न समय लाग्ने भएकाले जिल्ला अदालतबाट पूर्ण फैसला नभएसम्म कारागार चलान गरिएको कालीकोट जिल्ला अदालतका श्रेस्तेदार दामोदर घिमिरेले बताए । 

वडाध्यक्ष शाहीले पहिलो पटक २०७४ सालमा आफ्नो घरमा लगी बलात्कार गरेको र दोस्रो पटक १७ भदौ २०७६ मा किशोरीकै घरमा दिउँसो कोही नभएको मौका छोपी बलात्कार गरेको अनुसन्धानका क्रममा खुलेको एक प्रहरी अधिकारीले बताए । 

वडाध्यक्ष शाहीले ती किशोरीलाई धेरै पटक यौन शोषण गरेको ती प्रहरी अधिकारीको भनाई छ ।  
वडाध्यक्ष शाहीले किशोरीलाई विभिन्न बाहनामा धम्काएर बलात्कार तथा यौनहिंसा गर्ने गरेको प्रहरीको अनुसन्धानबाट खुल्न आएको छ ।  

पीडित किशोरी र वडाध्यक्ष शाहीको स्वास्थ्य परीक्षणका लागि नमुना काठमाडौंस्थित विधि विज्ञान प्रयोगशालामा पठाइएको र मेडिकल रिपोर्ट नआइसकेको बताइएको छ ।