Loading...
Logo
Image

आन्ध्र महासागरमा वेपत्ता पनडुब्बीको खोज जारी, अक्सिजनको अभावमा बेपत्ता पाँच जनालाई बचाउन कठिन

आन्ध्र महासागरमा सय वर्ष अगाडि डुबेको टाइटानिक जहाजको भग्नावशेष हेर्न समुद्रमुनि गएको पनडुब्बी वेपत्ता भएपछि त्यसको खोजी जारी छ । तर अहिलेसम्म पनडुब्बी फेला पर्ने कुनै संकेत छैन ।
पनडुब्बीमा रहेको अक्सिजन सकिन लागेकोले खोजी कार्यमा चिन्ता बढेको अन्तर्राष्ट्रिय सञ्चार माध्यमले जनाएका छन् । पनडुब्बी र त्यसमा सवार मानिस खोज्न लागिपरेका अधिकारीहरूका अनुसार अब उक्त पनडुब्बीमा थोरै मात्र अक्सिजन बाँकी छ, जसका कारण बचाउ अभियान अब निकै कठिन मोडमा पुगेको छ ।

यो खोजमा अमेरिकी, क्यानडेली नौसेना, समुन्द्रको गहिराइमा उत्रिने व्यावसायिक कम्पनी संलग्न छन् । हेलिकोप्टर, पानीजहाजले सोनार प्रविधिबाट पनि पनडुब्बीको खोजी तीव्र पारेका छन् । 

अमेरिकी तटरक्षकका अनुसार बचाउ अभियान निकै जटिल बन्दै गएको छ किनभने पनडुब्बीको स्थान पत्ता लगाउन सकिएको छैन । अमेरिकी अधिकारीहरूका अनुसार पनडुब्बी हराएको समुद्रमुनिको क्षेत्रबाट ठूलो आवाज पनि कैयौँपटक सुनिएका छन् ।

टाइटानिक हेर्न पनडुब्बीमार्फत समुन्द्रको ३ हजार ८०० मिटरको गहिराइमा पुग्नुपर्छ । जबकी एउटा व्यावसायिक गोताखोर पानी भित्र ४० मिटर तल मात्र पुग्न सक्छ । अमेरिकासहितका देशका जलसेनाले प्रयोग गर्ने शैन्य पनडुब्बी पनि ३०० मिटरको गहिराइमा पुग्छन् । सूर्यको किरण पनि समुन्द्रको तल एक किलोमिटरसम्म मात्र पुग्छ ।

बेलायतको विशाल टाइटानिक जहाज अमेरिकाको न्युयोर्क सिटी जाने क्रममा सन् १९१२ मा हिउँको ठूलो टुक्रासँग ठोक्किएपछि समुन्द्रमा डुबेको थियो ।

Comments