अनलाइनमार्फत जुवा खेलाउने तीन युवक काठमाडौंबाट पक्राउ परेका छन्।

पक्राउ पर्नेमा ताप्लेजुङको मिक्वाखोला गाउँपालिका–१ घर भई काठमाडौंको कोटेश्वर बस्ने २५ वर्षीय पुजन साँवा, सर्लाहीको बागमती नगरपालिका–२१ का निशानराज कार्की र सर्लाही बरहथवा नगरपालिका–११ हिरापुरा घर भई भक्तपुरको सूर्यविनायक नगरपालिका–४ बस्ने २५ वर्षीय निशान गौतम छन् ।

क्यास एप, मिल्की वे, फायरकिरिन, अल्ट्रा पान्डा लगायतका एप्लिकेसनमार्फत जुवा खेलाएको आरोपमा उनीहरूलाई पक्राउ गरिएको प्रहरीले जनाएको छ । 

प्रहरीले उनीहरूको साथबाट अनलाइन क्यासिनो खेलाउन प्रयोग भएका ल्यापटप तथा मोबाइल बरामद गरेको छ ।