बाँसबारी छाला जुत्ता कारखानाको जग्गा हडपेको अभियोगमा प्रहरीको केन्द्रीय अनुसन्धान ब्युरो (सीआईबी) ले पक्राउ गरेका व्यवसायी अरुण चौधरी रिहा भएका छन् ।

बुधबार उनलाई प्रहरीले छाडेको हो । जिल्ला अदालत काठमाडौंले चौधरीलाई थप बुझ्नुपर्ने भए दुई दिनभित्र सम्पन्न गर्न आदेश दिएसँग उनी छुटेका हुन् ।

चौधरीका साथै सोही प्रकरणमा पक्राउ परेका बाँसबारी छाला जुत्ता कारखानाका तत्कालीन कार्यकारी अध्यक्ष अजितनारायण सिंह थापा एवं अर्का व्यवसायी सञ्जय ठाकुर पनि रिहा भएका छन् ।

उनीहरूलाई छाडिए पनि अनुसन्धान भने जारी रहेको सीआईबीका प्रवक्ता प्रहरी उपरीक्षक नवराज अधिकारीले जानकारी दिए । 'जिल्ला अदालत काठमाडौंको आदेशअनुसार हाजिरी जमानीमा आज तीनै जनालाई छाडिएको छ, यद्यपि सो प्रकरणको अनुसन्धान भने जारी छ,' उनले भने ।

सोमबार काठमाडौँ जिल्ला अदालतका न्यायाधीश यज्ञप्रसाद आचार्यको इजलासले अनुसन्धानमा सहयोग गर्ने गरी हाजिर जमानीमा छाडी बाँकी अनुसन्धान पूरा गर्न सीआईबीलाई आदेश दिएको थियो ।