काठमाडौं, बैशाख २३ गते मंगलबार । काठमाडौं, ललितपुर र भक्तपुरका मेयरहरुले  काठमाडौं उपत्यकालाई पूर्ण रूपमा सिल गर्न संघीय सरकारलाई दबाब दिएका छन् ।

काठमाडौं उपत्यकाका मेयरहरुले उच्चस्तरीय कोरोना रोकथाम तथा नियन्त्रण समितिका संयोजक ईश्‍वर पोखरेललाई भेटेर काठमाडौं उपत्यकालाई सिल गर्न माग गरेका हुन् । 

काठमाडौं उपत्यकाका अहिलेसम्म ग्रीन जोनमा रहेपनी निरन्तर खुल्ला रुपमा मानिस आउने जाने क्रम बढेकोले संक्रमणको जोखिम बढेको भन्दै  उनीहरूले सरकारको ध्यानाकर्षणसमेत गराएका छन् । 'अहिले लकडाउन भनिएको छ तर लकडाउनजस्तो पनि भएको छैन । यहाँबाट बाहिरिनेहरू बाहिरिइरहेका छन्, भित्रिने भित्रिइरहेका छन्,' मध्यपुर थिमि नगरपालिकाका प्रमुख मदनकुमार श्रेष्ठले भने । 

काठमाडौं महानगरपालिकाका प्रमुख विद्यासुन्दर शाक्य, ललितपुर महानगरपालिकाका प्रमुख चिरिबाबु महर्जन र मध्यपुर थिमि नगरपालिकाका प्रमुख मदनकुमार श्रेष्ठले संयुक्त रूपमा सरकारलाई काठमाडौं उपत्यकालाई पूर्ण रूपमा सिल गर्न आग्रह गरेका हुन् ।  अहिले उपत्यका सुरक्षित रहे पनि कमी कमजोरी भएमा समस्या निम्तिन सक्ने र ठूलो क्षति बेहोर्नुपर्ने हुन सक्ने उनीहरूले बताए । 

देसभर लकडाउन भएपनी उपत्यकाबाट आउने जाने क्रम भने रोकिएको छैन ।